Amerika və Qərbdə vaxtın idarəedilməsi ilə bağlı 2 cür yanaşma var, qulaq asdığım podkastlarda bir qismi bu fikirdədir ki, günü lazım olduğu qədər məhsuldar keçirmək lazımdır. Bir qismi isə bu fikirdədir ki, biz insanıq, vaxtı idarə edərək yaşasaq robotdan bir fərqimiz olmayacaq. Ancaq mən birinci fikirdə olanların tərəfindəyəm. Məsələn, Portuqaliya əsilli, məşhur futbolçu Cristiano Ronaldo müsahibələrinin birində deyir ki, “Mən evə gəlirəm, bir çox işlərdən sonra ailəmlə zaman keçirirəm, daha sonra 30 dəqiqə idmanla məşğul oluram. Deyə bilərəm ki, gün ərzində bir çox işlər ilə məşğul oluram, amma özümə ayırdığım yalnız 30 dəqiqə mənim günümü daha dəyərli edir”. Həmin zaman müsahibəsində deyirdi ki, “Elə buna görə də, 36 yaşım (hazırda 37) olsa da, hamı elə bilir ki, 28 yaşındayam”. Öz təcrübəmdən deyə bilərəm ki, hər gün 30 dəqiqə idman, qısa gəzinti, ən azı 3-4 səhifə kitab oxusanız (amma bunu hədəflədiyiniz dildə edin) və bunu hər gün etsəniz uzunmüddətli dövrdə, həm insanlarla söhbət üçün kifayət qədər mövzunuz olacaq, həm də xarici görünüşünüz də yerində olacaq.
Zaman çox vacibdir, ancaq təəssüf ki, bizim kimi cəmiyyətlərdə “VAXT ÖLDÜRMƏK” anlayışı var. İnsanlar vaxtını “Candy Crush Saga” oynamaqla, heç bir dəyər qatmayan türk seriallarına baxmaqla, dedi-qodu etməklə, söhbət edən zaman belə hər kəsin öz EQO-sunu və çox bildiyini nümayiş etdirən danışmaqla (əslində dinləməli və analiz etməliyik) keçiririk. Hələ WhatsApp-da Statuslar bölməsində kontakt siyahısındakıların tək-tək statuslarına baxıb, onlara rəy yazanları demirəm. Bir insanın zamanı necə “kiçik bir pəncərəyə” sığa bilər axı? Həmçinin, sizinlə vaxt öldürmək istəyən insanları ilə də elə indicə yollarınızı ayırmağı məsləhət görürəm. Sizə dəyər qatmayan heç bir insana zaman və enerjinizi xərcləməyin. Bir yerdə oxumuşdum biz vaxt və enerjimizi yanlış insanlara xərcləməməliyik, çünki düzgün olanlara nə vaxtınız, nə də enerjiniz olacaq.
Ən maraqlı isə budur ki, vaxtınızı özünüz ilə keçirsəniz, məsələn, dedi-qodu əvəzinə telefonunuza podkast yükləyib, gəzərək qulaq assanız daha çox qazanacaqsınız. Və bizim cəmiyyət belə insanları da sevmir.
Bir bəlkə də həyatınızı dəyişə biləcək fikir eşidəcəksiniz, eləcə də fiziki və mental sağlamlığınız yerində olacaq. Yəni, eyni ayda 2 faydalı iş görmüş olacaqsınız. Əlbəttə, biz hamımız insanıq, problemlərimiz olur, həmin gün nəsə etmək istəməyə bilərsiniz. Yaxud bütün günü “junk food” yeyib yatmaq istəyə bilərsiniz. Bu normaldır, mən də bunu edirəm, ancaq bu 1 ayın 3-4 gününü keçmir. Bir tövsiyəm isə budur ki, çalışın faydalı işləri vərdişə çevirəsiniz, məsələn, dişlərinizi hər gün fırçaladığınız kimi.
Comments
Post a Comment