Pulumuz gedir, sağlamlığımız da

“That Sugar Film”ə baxdıqdan sonra, şəkərin insan sağlamlığındakı ziyanlı tərəflərini aydın görmək olur.

Filmdən sonra, şəkər istehlakımı azaltmağı düşünürəm. Məncə, sizlərdə bu fikirləri oxuduqdan sonra, bu qənaətə gələcək və özünüzü şəkərdən uzaq durmağa məcbur edəcəksiniz. Məntiqlə düşünsək pul qazanıb, onu sağlamlığımızı itirmək üçün niyə xərcləyək ki?

Sənədli filmdəki bəzi maraqlı nüansları qeyd etməyi vacib bildim.  Filmə baxmağı isə yaşından asılı olmayaraq hər kəsə tövsiyə edirəm.

- Britaniyalı həkim Con Yudkinin fikirincə, hər kəs ildə 2 kq şəkər istehlak etsə, bundan məmnun olardım, amma onların 1 ildə istehlak etdikləri şəkərin miqdarı 50 kq-dır.

- Əgər supermarketdən şəkərlə bağlı olan qidaları çıxartsaq, piştaxtaların 20%-i boş qalar.

- “Coca Cola” şirkətinin 2008-ci ildə apardığı araşdırmaya görə, Coca Colanın satışlarında adambaşına düşən ən yüksək artım Avstraliyanın şimal torpaqları olub.

- Amata, Şimali Avstraliyada yerləşən qəsəbələrdən biridir. Burada yerli əhali aborijenlər məskən salıb və onların ulu babaları heç vaxt spirtli içkidən istifadə etməyib. Amma 2007-ci ildə aparılan araşdırmaya görə, əhalisinin sayı 400 nəfərdən az olan qəsəbədə 40000 litr Cola istehlak edilib.

- Qədim zamanlarda aborijenlər ildə 2-3 ədəd şəkərdən istifadə ediblər.

- Yerli əhali içində böyük miqdarda şəkər olan qidaları yedikdən sonra ölüm səviyyəsi 40 yaşının altına düşüb.

- Yerli əhali deyir ki, Şimali Avstraliya torpaqlarında, Amatada yaşayan babaları təxminən 40 il bundan qabaq təbiətdən birbaşa olaraq aldıqları heyvan və bitkilər ilə qidalanıblar. Bu da onların uzunömürlü olmasına səbəb olub. Amma bu gün isə onlar qədim tayfalarının yox olacağından narahatdırlar.

- Hər gün 40 çay qaşığı qədər şəkər istehlak edən birinin çəkisi  bir neçə ay boyunca 8 kq artır.

- 4 ədəd almanın suyunu sıxdığımız zaman ondan bir bardaq şəkər əldə etmək olar. Bir almada təxminən 4 çay qaşığı qədər şəkər var. Amma normalda 2 ədəd alma yesək, bu bizim bədənimizi lazım olan liflər ilə təmin etmiş olacaq. Beləliklə biz insanlar meyvə suyunu çıxaran texnika icad etdik və bədənimizi daha çox şəkər istehlak etməyə məcbur etdik.

- Aparılan araşdırmaya görə, enerji içkilərinin 20 dəqiqədən sonra (tərkibində şəkərin miqdarı çoxdur) təsiri keçir, nəticə də yenisini alıb içmək kimi bir alışqanlıq yaradır.

- Şirkətlər uşaqlarda bu gözləntini yaratdılar: Yedikləri hər şeydə mütləq şəkər olmalıdır!

- Müasir dövrdə insanların təşkil etdikləri bütün festival, şənliklərin tərkib hissələrindən biri də şəkər, şirniyyatdır.