Yersiz sual verənlər... : “Sənə nə var?”

Milli Mətbuat Günündə belə bir yazı yazmaq istədim. Yersiz sual verənlər haqqında. Deyə bilərəm ki, bu məsələ son günlər yaralı yerlərimdən biridir. Çox təəssüf ki, ətrafımızdakı belə insanların sayı da günbəgün artır. Xüsusən də, məişətdə. 

Keçən dəfə psixoloqun biri danışır ki, əslində birini xarici görünüşünü nə bilim canım sizə desin, burnunun böyüklüyünü, qulaqlarının yekə olmasını, qaşlarının qalın olmasını, kök olmasını və s. desəniz bu qarşındakı şəxsə qarşı duyğusal şiddət olur. Amma nəzərə alın ki, qarşıdakında qüsur tapmaq istəyən o qədər qüsur tapacaq ki...  Yetər ki, istəsin...

Birinə burnun uzundur deyiləndə, qayıdıb demək istəyirsən ki, “Sənə nə var?”. (Hərçənd ki, valideynlərimə təşəkkür edirəm ki, burnum uzun deyil 😊) Üstəgəl bu gün qayıdıb adama qaşların niyə qalındır, saçlarını niyə rəngləndirmirsən deyirlər, yenə demək istəyirsən “Sənə nə var?”. 

Amma o daxildəki mədəniyyət qarşındakı şəxsə bu sualı verməkdən səni çəkindirir. 

Yersiz suallar xarici görünüş ilə bitmir. Hər gün meyvə, yoğurt və s. aldığın satıcı səndən soruşur: “Yenə meyvə?”. Hər dəfə də eyni sualı verir. Bir dəfə də qayıdıb soruşmur ki, niyə meyvə alırsan? Mən də deyim pəhrizdəyəm, heç olmasa əl çəkə. 

Fərqli bir gün və yenə eyni satıcı. “Bu gün işə tez çatmısız”. Siz də saata baxıb, doğrudan deyə sual verirsiniz? O da gülümsəyərək, başı ilə təsdiq edir. Çıxıb gedirsiniz.. Başqa bir yersiz sual, bir insana şəxsi həyatı ilə bağlı verilən suallardır. Zatən danışmaq istəyən sizə deyəcək, niyə sual verirsiniz?

Xatırlayıram, bir dəfə yaxından tanıdığım, sual verməyə ərk etdiyim birindən niyə arıqlamırsınız deyə soruşdum. O da arıqlamaq üçün xəstəliyinin keçməsinin vacib olduğunu dedi. Doğrudan da qarşıdakı çox kökdürsə, bu sadəcə “Sizin ağlınızda olan Ay da gör nə qədər yeyir ki, belə günə qalıb” demək deyil. 

Yaxud kimsə, saçlarını rəngli etmirsə, bu o demək deyil ki, rəngli saçla gəzmək xoşuna gəlmir. Sadəcə təbbi saçlarını itirmək istəmir. 

Lütfən, qarşımızdakına belə suallar verməyək. Yoxsa, kobud cavab eşitsəniz, öz günahınızdır.